ANS-lə bağlı son qərar verildi – Aytəkin Alxaslı ağladı

ANS telekanalının lisenziyasına xitam verilməsi barədə Bakı Apellyasiya Məhkəməsinin qərarından verilən kassasiya şikayətinə Ali Məhkəmədə hakim Sevda Hüseynovanın sədrlik etdiyi kollegiya baxıb. 
.
Prosesdə ANS-in hüquqşünası Sevda Məhərrəmova məhkəmə prosesinin təxirə salınması barədə vəsatət qaldırıb. O, bildirib ki, ANS-in Fətullah Gülən şəbəkəsi, o cümlədən Türkiyədə baş verən olaylarla əlaqəsi ilə bağlı araşdırmalar gedir. “Hətta Türkiyə mediası da araşdırmalar nəticəsində ANS-in bu məsələlərə heç bir aidiyyəti olmaması qənaətinə gəlib” – deyə hüquqşünas bildirib. 
Məhkəmə vəsatəti təmin etməyib. 
.
ANS-in vəkili Fuad Ağayev çıxışında bildirib ki, bu telekanalın efirində nəinki Fətullah Gülənlə müsahibə, heç müsahibənin anonsu da getməyib: “Bunu başqa KİV-lər veribsə, ANS-ə nə dəxli var? Kimsə kimisə güllələsə, ANS məsuliyyətə cəlb olunmalıdı? Təəssüf ki, həmin anonsu vermiş KİV-lərin heç birini də çağırıb məhkəmədə dindirməyiblər” – deyən vəkil əlavə edib ki, apellyasiya məhkəməsinin qərarı qanunsuz və əsassız olduğu üçün ləğv edilməlidir. 
.
ANS-in prezidenti Vahid Mustafayev isə çıxışında deyib ki, Türkiyədəki olaylarla bağlı efirə verdikləri kadrlar əsasən Türkiyə kanallarından götürülüb. “Məsələlərə bir az da qanun çərçivəsində baxaq. Hakimlər, prokurorlar mənə desin ki, “qardaş, bunu səhv eləmisən”, mən də əsaslandırım ki, səhv eləməmişəm. Azərbaycan vətəndaşı olaraq, mənə bu haqqı heç kim vermədi. Kaş biz də o vaxt birinci Qarabağ müharibəsində öləydik, bu günü görməyəydik ki, bizi terrorçulara dəstək verməkdə günahlandırırlar. Anam ötən il rəhmətə getdi, 89 yaşlı atam eşidəndə ki, onun övladlarını belə bir əməldə ittiham edirlər, çox sarsıldı. Axı belə olmaz…”
.
Vahid Mustafayev “ANS ÇM” radiosunun bağlanmasından da danışıb: “Çingiz Mustafayevin adını daşıyan radiostansiyanı niyə bağladılar? Onun nə günahı var? Çingiz təkcə mənim qardaşım deyil, bütün Azərbaycanın sərvətidi. Biz məsələnin yalnız məhkəmə yolu ilə həllinə çalışırıq. Bizi başqa ölkədə baş verən olaylarda suçlamağa imkan verməyin. Qaranlıq otaqda qara pişiyi tapmaq çox çətindi, xüsusən, əgər o pişik orada yoxdursa…” 
 .
ANS-n baş direktoru Mirşahin Ağayev Türkiyədə məlum hadisələr baş verən gecə efirə verdikləri materialları bir-bir sadalayıb: “Biz Türkiyə səfirini 40 dəqiqə axtarandan sonra evindən çıxarıb idman geyimində gətirdik. Efirə çıxartdıq, Türkiyə hömumətinin mövqeyini ifadə etdi”. 
 .
İddiaçı tərəf isə ANS-in kassasiya şikayətinə etiraz edib və onun təmin olunmamasını istəyib. “ANS qanunvericiliyin tələblərini kobud şəkildə pozaraq, terrorçuluğa dəstək, terrora çağırış ifadə edən materiallar yayımlayıb”, – Milli Televiziya və Radio Şurasının nümayəndəsi Toğrul Məmmədov bildirib.
 .
Müşavirədən sonra şikayət təmin edilməməsi ilə bağlı qərar elan edilib. Bizimyol.info məlumat verir.
 .
Qərar elan olunandan sonra ANS-in bölgə müxbiri Aytəkin Alxaslı ağlayıb.
 .
Qeyd edək ki, ANS-in bağlanmasına səbəb telekanal əməkdaşının Türkiyədə dövlət çevrilişinə cəhddə ittiham olunan Fətullah Gülənlə müsahibə götürməsi olub. 
 
“Televiziya və radio yayımı haqqında” Azərbaycan Respublikası Qanununun 11-ci maddəsinə əsasən, Azərbaycan dövləti televiziya və radio vasitəsilə terrorizmin, zorakılığın, qəddarlığın, milli, irqi və dini ayrı-seçkiliyin təbliğinə yol verilməməsinə nəzarət edir. Dövlət quruluşunu zorakılıqla devirməyə, dövlətin bütövlüyünə və ölkənin təhlükəsizliyinə qəsd etməyə, milli, irqi və dini ədavəti qızışdırmağa, kütləvi iğtişaşlar törətməyə və terrorizmə açıq çağırışlar teleradio yayımçısı tərəfindən müdafiə olunduqda və ya bu çağırışları səsləndirməyə bilərəkdən şərait yaradıldıqda teleradio yayımçısının fəaliyyəti müvəqqəti dayandırıla bilər.
 
18 iyul 2016-cı il tarixdə Milli Televiziya və Radio Şurasının iclasında ANS ÇM-ə verilmiş xüsusi razılığın (lisenziyanın) qüvvəsinə xitam verilib, həmçinin “ANS Müstəqil Yayım və Media” Şirkətinin yayımı bir ay müddətinə dayandırılıb və lisenziyanın qüvvəsinə xitam verilməsi barədə məhkəməyə müraciət edilib. 
 
29 iyulda Bakı Apellyasiya Məhkəməsində hakim Ülvi Mayılovun sədrliyi ilə keçirilən iclasda müraciətə baxılıb və təmin edilib. ANS həmin qərardan Ali Məhkəməyə kassasiya şikayəti verib.
Bizimyol.info

Bir cavab yazın

%d bloqqer bunu bəyənir: