Siyasi məhbusun intiharı ilə bağlı Baş Prokurorluqdan AÇIQLAMA

Baş Prokurorluq siyasi məhbus Mehman Qələndərovun intihar etməsi ilə bağlı məlumat yayıb.

Qurumun mətbuat xidmətindən verilən məlumata görə, həmin faktla bağlı Sabunçu rayon Prokurorluğunda Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanıb.

Ölümün səbəblərinin müəyyənləşdirilməsi istiqamətində zəruri istintaq tədbirləri davam etdirilməklə məhkəmə tibbi ekspertizası təyin olunub.

Qeyd edək ki, M. Qələndərov aprelin 28-də 1 saylı Bakı İstintaq Təcridxanasında intihar edib. Onun barəsində Nəsimi məhkəməsi tərəfindən 3 aylıq həbs qətimkan tədbiri seçilib. M. Qələndərov Cinayət Məcəlləsinin 234.2-ci maddəsi ilə (satış məqsədi ilə qanunsuz olaraq narkotik vasitələri və ya psixotrop maddələri əldə etmə və ya saxlama, hazırlama, istehsal etmə, emal etmə, daşıma, göndərmə, yaxud qanunsuz olaraq narkotik vasitələri və ya psixotrop maddələri satma) ittiham olunub.

Qeyd edık ki, Mehman Qələndərov həbsindən əvvəl Tbilisidə yaşayan azərbaycanlı mühacirlərin “Qul bayramınız mübarək!” şuarı altında keçirdikləri aksiyanın təşkilatçılarından biri olub.

Mehman Qələndərovun nəşinin yaxınlarına verilməsindən imtina olunub.

Məlumatı hüquq müdafiəçisi Oqtay Güləliyev öz “Facebook” səhifəsində paylaşıb. Hüquq müdafiəçisinin sözlərinə görə, Penitensiar Xidmət öz yalanını ört-basdır etmək üçün belə edir:

“Aldığım məlumatlara görə, Penitensiar Xidmətin Mehmanın hazırda öz kamerasında sağ- salamat olması ilə bağlı yaydığı biabırçı yalan məlumatdan sonra onun nəşinin yaxınlarına verilməsindən imtina olunub. Hökumət Mehman Qələndərovu gizlicə dəfn etmək istəyir. Mehmanın atası, anası və öz ailəsi yoxdur. Qohumlarına ciddi təzyiqlər var və onlar nəzarət altındadır. Hətta əldə etdiyim məlumata görə, ona yas vermək də qadağan olunub. Bütün bunlar isə Mehmanla bağlı bu gün sosial şəbəkələrdə onun müəmmalı intihar xəbərinin yayılması və Penitensiar Xidmətin biabırçı təkzibidir. Hökumət təkzibinin girovuna çevrilib. İstəyir ki, Mehman haqqında heç kim heç nə yazmasın və soruşmasın. Bu olayı gizlicə yola versin. Əslində baş verənlər- ölümün təkzibi, nəşin verilməməsi, gizlincə dəfn istəyi, qohumlara və bizlərə təzyiq Mehmanın intihar olayının arxasında daha ciddi məqamların dayandığını deməyə əsas verir”.

mehman qelenderov

O.Güləliyev təzyiqlə üzləşdiyini də deyir:

“Onun intiharı barədə məlumatı ictimailəşdirdikdən sonra mənə çoxsaylı müraciətlər və zənglər, eyni zamanda təzyiqlər edilir. Ola bilər ki, mənim bu yazımdan sonra onun bəzi qohumlarını yazdıqlarımı təkzib, məni isə ittiham etməyə qaldırsınlar. Olsun, önəmlisi Mehmanla bağlı baş verənlərə bizim adekvat münasibətimizin olmasıdır”.

Hüquq müdafiəçisi ictimaiyyətə çağırış edib:

“Dostlar, Mehman Qələndərov sıradan bir adam deyil. İctimai- siyasi fəal olub. “Kral istəmirik”, “Gəlin hamımız Qiyas olaq” dediyinə və Heydər Əliyevin heykəli önünə gedərək Qiyasla Bayramın həbsi ilə bağlı təkbaşına etiraz aksiyası keçirdiyinə, çağırış etdiyinə, şüar səsləndirdiyinə görə narkotika ittihamı ilə şərlənərək həbs olunub. Az öncə aldığım məlumata görə, bu hərəkətinə görə onu həbs edən zaman ağır işgəncə veriblər, ona qarşı qeyri- insani münasibət göstəriblər. Təhdid edərək həbsxanadan sağ çıxmayacağını bildiriblər. Bu da son!!!

Əziz dostlar, sizləri Mehman Qələndərovla bağlı baş verənlərə biganə qalmamağa çağırıram. Gəlin ona son vəfa borcumuzu yerinə yetirək. Onun gizli dəfninə imkan verməyək, nəşinə baxış keçirilməsini, əsl ölüm səbəbinin ortaya çıxmasına nail olaq! Ölkədə bir layiqli vətəndaş, siyasi məhbus dünyasını dəyişib. Gəlin susmayaq. Hamımız bir yerdə Mehman Qələndərovun nəşini tələb edək və onun dəfnində iştirak edək! Mən hökumətin yanında olmayan bütün azad medianı, siyasi partiya rəhbərlərini, ictimai təşkilat rəhbərlərini, hüquq müdafiəçilərini, beynəlxalq təşkilatları Mehman Qələndərovla bağlı fəal vətəndaş cəmiyyəti mövqeyi nümayiş etdirməyə çağırıram!”

Mehman Qələndərovun aprelin 28-də saxlandığı kamerada intihar etdiyi bildirilir. Penitensiar Xidmət “Amerikanın səsi”-nə məlumatı təkzib edib və Mehman Qələndərovun sağ-salamat kamerasında olduğunu deyib. Məhbusun bacısı isə ölüm xəbərini təsdiqləyib.

Mehman Qələndərovun adı hüquq müdafiəçilərinin hazırladığı siyasi məhbus siyahısına salınıb.

Bastainfo.com

%d bloqqer bunu bəyənir: