İlham Əliyev müxalifətin mitinqlərindən danışdı

Müxalifətin mitinqləri normal, adi vətəndaşları cəlb etmir və burada bizim günahımız yoxdur.

APA-nın məlumatına görə, bunu ölkə başçısı İlham Əliyev oktyabrın 4-də Avropa İttifaqının Brüsseldə akkreditə olunmuş səfirlərinin daxil olduğu Avropa İttifaqı Şurasının Siyasi və Təhlükəsizlik Komitəsinin nümayəndə heyəti ilə görüşündə yekun nitqi ilə çıxışı zamanı deyib.

Dövlət başçısı deyib ki, Azərbaycanda bütün azadlıqlar təmin olunur, əhalimizin 70 faizindən çoxu internet istifadəçisidir və dövlət hər bir şəhər və qəsəbəyə genişzolaqlı internetin çəkilməsi sahəsinə sərmayə yatırır:

“Yəni, mətbuat azadlığının tərəfimizdən məhdudlaşdırılmasından söhbət gedə bilməz və bizim belə bir niyyətimiz yoxdur. Əks təqdirdə, biz bütün bu işləri görməzdik. Daha bir azadlıq toplaşma azadlığıdır. Bu azadlıq tam təmin olunur, heç bir məhdudiyyət tətbiq edilmir və müxalifət müntəzəm surətdə mitinqlərini keçirir. Həmin mitinqlərdə min nəfərə yaxın insanın iştirakı isə digər bir məsələdir. Bunlar əsasən partiyaların üzvləri və onların qohumlarıdır. Yəni, bu mitinqlər normal, adi vətəndaşları cəlb etmir və burada bizim günahımız yoxdur. Həmin mitinqlər şəhərin mərkəzində, metro stansiyasının yaxınlığında keçirilir, heç bir məhdudiyyət qoyulmur və sonuncu mitinq isə, zənnimcə, bir həftə əvvəl baş tutub. Beləliklə, hər hansı bir azadlığın məhdudlaşdırılması ilə bağlı niyyət və əməldən söhbət gedə bilməz”.

İlham Əliyev deyib ki, həbslərə gəldikdə, onlar hər bir ölkədə baş verir: 

“Polis zorakılığına dair deyə bilərəm ki, siz Azərbaycanda onun şahidi ola bilməzsiniz, çünki o, mövcud deyil. Bəzən biz sizin təmsil etdiyiniz ölkələrdə polis zorakılığını görürük. Ancaq heç kəs sizi demokratiyanın olmamasında və zorakılıqda ittiham etmir. Biz itlərin dinc etirazçılara hücum etmələri səhnələrini yaxşı xatırlayırıq. Atlardan və dəyənəklərdən istifadə olunmasını biz televizordan izləyirik. Yəni, bu baxımdan da yanaşma obyektiv və vahid olmalıdır. Azərbaycan etmədiyi əməllərə görə gözdən salınmamalıdır. Eyni zamanda, demokratiyanın rəmzi hesab olunan dövlətlərin hərəkətləri normal qəbul edildiyi halda, biz atdığımız bənzər addımlara görə tənqidə məruz qalmamalıyıq. Ancaq şübhəsiz ki, insan haqları və demokratik inkişafla bağlı məsələlər bizim Avropa Komissiyası ilə sazişimizin tərkib hissəsi olacaq”.

İlham Əliyevin bu açıqlamasını şərh edən Müsavat Partiyasının mətbuat xidmətinin rəhbəri Mustafa Hacıbəyli ölkədə demokratik azadlıqların yalnız sözdə təmin edildiyini bildirib:

“Azərbaycanda yalnız Məhsul stadionunda mitinqlərin keçirilməsinə icazə verilir. Paytaxtın qalan hissəsində və rayonlarda aksiyaların keçirilməsinə qeyri-rəsmi qadağa var.  Hətta Məhsul stadionunda da bazar günü mitinqlərin keçirilməsinə qadağa var. İlham Əliyev Məhsul stadionunda keçirilən aksiyaları misal göstərib beynəlxalq ictimaiyyəti aldatmağa çalışır. Amma hətta burada icazə verilən aksiyalarda iştirak etdiyinə görə də insanlar polisin, icra hakimiyyətinin təzyiqləri ilə üzləşirlər”, – Mustafa Hacıbəyli bildirib.

“Bəli, hər kəs internetdən istifadə edə bilər. Amma sosial şəbəkədə Əliyev hakimiyyətini tənqid edənlər daim həbs olunmaq təhlükəsi ilə üz-üzədir. Son dövrdə onlarla insan sosial şəbəkədə yazdığı tənqidə görə inzibati həbsə məruz qalıb. Məsələn, keçən həftə Şəkidə müsavatçı Tahir Əhmədli facebukda yazdığı 1 tənqidi cümləyə görə 25 sutka həbs cəzası alıb. Hətta Elgiz Qəhrəman kimi uzun müddətli həbsə məruz qalanlar da var. Azərbaycanda 9 jurnalist həbsdədir.  Müstəqil televiziya yoxdur. Qəzetlər ya satın alınıb, ya da bağlanıb. Saytların girişi bloklanır. Bundan sonra söz azadlığından danışmaq ayıbdır”, – Mustafa Hacıbəyli vurğulayıb.

Bastainfo.com

%d bloqqer bunu bəyənir: