Müsavat şərlənərək həbs edilmiş Əlikram Xurşidovun azadlığa buraxılmasını tələb edir – Bəyanat

Müsavat Partiyası Şirvan şəhər təşkilatının sədri Əlikram Xurşidovun həbsi ilə bağlı bəyanat yayıb.

“Basta”ya təqdim olunan bəyanatda deyilir:

“Azərbaycan ictimaiyyətinin və beynəlxalq birliyin siyasi məhbusları azadlığa buraxılması tələbi ilə təzyiqlərinə baxmayaraq, Əliyev hakimiyyəti repressiya siyasətini davam etdirir.

Noyabrın 22-də heç bir əsas olmadan polis tərəfindən saxlanılan Müsavat Partiyası Şirvan şəhər təşkilatının sədri, Məclis üzvü Əlikram Xurşidov 2 sutkaya yaxın qanunsuz olaraq polis şöbəsində saxlandıqdan sonra, ona qarşı uydurma cinayət işi qaldırılıb. Noyabrın 24-də isə Şirvan Rayon Məhkəməsi sifarişli qərar qəbul edərək, bu uydurma ittiham əsasında Əlikram Xurşidovun barəsində 3 ay müddətinə həbs qətimkan tədbiri seçib.

Əlikram Xurşidov müxalifətçilərə qarşı ənənəvi olaraq irəli sürülən “xuliqanlıq”da təqsirləndirilib. Ona qarşı yazılan “şikayət ərizəsi” təşkil olunmuş şərləmədir. Əlikram Xurşidov alicənab, mədəni, halal zəhməti ilə dolanan bir insan olaraq yaşadığı bölgədə böyük hörmət sahibidir.

Əlikram Xurşidov əqidəli müsavatçı olaraq, Azərbaycanda və yaşadığı Şirvan şəhərində baş verən qanunsuzluqlarla əlaqədar daim barışmaz mövqe tutub, son dövrdə isə sosial şəbəkədə Şirvan rayon İcra Hakimiyəti başçısının qanunsuz metlax biznesi, bölgədəki korrupsiya,  eləcə də büdcə təşkilatlarında çalışanların inzibati üsullarla YAP-a üzv qəbul etdirilməsi haqqında xəbərlər paylaşıb. Hakimiyyət siyasi partiyaların yerli qurumlarının fəaliyyəti üçün şərait yaratmadığı üçün Müsavatın yerli təşkilatının toplantıları da Əlikram Xurşidovun mənzilində keçirilirdi. Əlikram Xurşidovun həbsinin motivi məhz bunlardır.

Müsavat Partiyası şərlənərək həbs edilmiş Əlikram Xurşidovun dərhal azad edilməsini, ona qarşı açılan cinayət işinin xətm olunmasını və Azərbaycanda davam edən repressiya siyasətinin durdurulmasını tələb edir”.

 

Bastainfo.com

%d bloqqer bunu bəyənir: