Əziz Orucov həbsdən azad edildi

Kanal 13 internet televiziyasının direktoru Əziz Orucov həbsdən azad edilib.

Bu barədə Ali Məhkəmədə hakim Əli Seyfəliyevin sədrlik etdiyi kollegiyada qərar qəbul edilib.

Qərara görə, Əziz Orucovun vəkillərinin verdiyi kasasiya şikayəti üzrə hökm dəyişdirilib. Onun barəsində Cinayət Məcəlləsinin 192-ci maddəsinə xitam verilib. Məhkəmə bu epizod üzrə təqsirləndirilən şəxsin günahız olması nəticəsinə gəlib. Cinayət Məcəlləsinin 308-ci maddəsi üzrə  ona şərti cəza verilib.

Qeyd edək ki, bir müddət əvvəl Bakı Ağır Cinayətlər Məhkəməsinin hökmü ilə Əziz Orucov 6 il müddətinə azadlıqdan məhrum edilmişdi. Hökmdən narazı qalan təqsirləndirilən şəxs apelyasiya şikayəti verib və barəsində bəraət hökmünün çıxarılmasını istəmişdi.

Əziz Orucovun səhhətində ciddi problemlər yarandığı bildirilirdi.

Bakı Apelyasiya Məhkəməsi Əziz Orucovun apellyasiya şikayətini təmin etməmişdi.

Əziz Orucov Cinayət Məcəlləsinin 192-ci (qanunsuz sahibkarlıq, külli miqdarda gəlir əldə etməklə törədildikdə) və 308-ci (vəzifə saxtakarlığı) maddəsi ilə ittiham olunub.

Jurnalistin özü həbsinin rəhbərlik etdiyi Kananl 13-ün fəaliyyəti ilə bağlı olduğunu və siyasi motiv daşıdığını bildirib.