Paşinyanın seçilməməsində “rus barmağı”

Ermənistan parlamenti müxalifət lideri Nikol Paşinyanın baş nazirliyə namizədliyinə səs verməyəndən sonra kütləvi etirazların yenidən başlaması qərb mediasının diqqət mərkəzindədir.

Paşinyan hərəkatı keçmiş sovet respublikasında demokratiyanı misli görünməmiş səviyyəyə yüksəltdi, Ermənistana, azından müvəqqəti də olsa, avtoritar idarəçilikdən canını qurtarmaq fürsəti verdi. Paşinyan etiraz hərəkatının geosiyasətdən asılı olmadığını, hakim elitada kök salmış korrupsiya və qohumbazlığa yönəldiyini bildirir, ancaq hakim partiya onu ‘antirusiya fəallığı’nda suçlayıb”, – “The Washington Post” qəzetində Amie Ferris-Rotman yazır.

“ANTİRUSİYA OLDUĞUNU İFŞA ETMƏYƏ ÇALIŞIRLAR”

Bu ölkədə iki hərbi bazası olan Moskva son həftələr baş verənləri ehtiyatla izləyir. Ötən həftə Ermənistanın iki rəsmisi danışıqlar üçün Moskvaya uçub. Müəllif yazır ki, Pashinyanın özü dilə gətirməyə meylli olmasa da, bəzi müşahidəçilər parlamentdəki dünənki səsvermədə Moskvanın barmağını görürlər.

Səsvermədən öncə parlament üzvləri Paşinyanı dörd saat ərzində sorğu-suala tutublar və Rusiya məsələsinə dəfələrlə oxunulub. Deputatlardan biri ondan soruşub ki, Rusiyanın müxalifət lideri Alexey Navalnıdan yardım alıbmı. Başqa birisi sual edib ki, Paşinyan Ermənistanın üç il öncə qoşulduğu Rusiyanın ticarət blokuna üzvlüklə bağlı fikrini dəyişibmi.

Hakim Respublikaçıların Paşinyanın Rusiyayla bağlı mövqeyinə dair suallara baxanda görürük ki, bəziləri onun antirusiya olduğunu ifşa etməyə çalışırdı”, – IHS Markit-in Rusiya və keçmiş Sovet İttifaqı üzrə baş iqtisadçısı Lilit Gevorgyan deyib.

Paşinyanın məğlubiyyəti onu siyasi baxımdan bir pillə aşağı saldı. Bu, qeyri-sabit, qeyri-müəyyən durum yaradır”, – bunu isə Cənubi Karolina Universitetinin Ermənistan Araşdırmaları İnstitutunun təhlilçisi Emil Sanamyan “The New York Times” qəzetinə deyib.

BİZNES ZƏMANƏTİ

Paşinyan müttəfiqləri ilə birlikdə ölkəni illər boyu idarə etmiş siyasi və iqtisadi monopoliyaları yarmağa and içib. Sanamyanın fikrincə, elə onun baş nazirliyinə gedən yolda əsas əngəl də bu məqam ola bilər. Respublikaçı Partiyanın biznes cameəsi ilə əlaqələri güclüdür və görünür, deputatlar onun namizədliyini təsdiqləməzdən öncə bəzi zəmanətləri əldə etmək istəyirlər.

Parlament üzvləri dəfələrlə deyiblər ki, Paşinyanla danışmaqdan ötrü onlara vaxt lazımdır.

Tənqidçiləri Paşinyannın Ermənistanın Avrasiya İqtisadi Birliyinə qoşulmasına qarşı çıxmasını yada salır, onu Kremlin tənqidçisi, qonşu Gürcüstanın keçmiş prezidenti Mikheil Saakaşvili ilə əlaqələndirməyə çalışırlar.

Paşinyan isə Rusiyanı əmin etməyə çalışır ki, Ermənistan onun vacib müttəfiqi olaraq qalacaq.

Mərkəzdəki Respublika Meydanında yüzminlərlə nümayişçinin qəzəbinin yüksəlməsi Respublikaçıların populyarlığının süqutunu, siyasi səhnədən getməsini sürətləndirəcək”, – “The Financial Times” qəzeti Yerevandakı Regional Araşdırmalar Mərkəzinin direktoru Richard Giragosyana istinadla yazır.

 

AzadlıqRadiosu