Facebook Rusiya və İrana bağlı dezinformasiya hesablarını bağlayır

Facebook Rusiya və İrana bağlı, ABŞ-da noyabrda keçiriləcək konqres seçkilərindən öncə siyasi dezinformasiya yayan 652 hesab və vebsaytı bağladığını bildirir.

300-DƏK HESAB QAPADILIB

Sosial şəbəkənin avqustun 21-də bildirməsinə görə, Facebook və Instagram-dan həmin hesabları ona görə silib ki, onlar “koordinasıyalı etibarsız davranış” sərgiləyiblər, yanlış yönləndirici siyasi material paylaşıblar.

Twitter də avqustun 21-də bildirib ki, antisəudiyyə, antiisrail, fələstinpərəst İran təbliğatı aparan 300-dək hesabı qapadıb. “Reuters”in yazdığına görə, Twitter bu platformada “koordinasiyalı manipulyasiya”nın ötən ildən başladığını bildirib.

Facebook ötən ildən sosial şəbəkəyə nəzarəti gücləndirib. Ötən il etiraf edib ki, rusiyalı agentlər 2016-cı ildə ABŞ-da prezident seçkisinə təsir göstərmək məqsədilə bu platformada əməliyyatlar aparıblar.

Mark Zuckerberg
Mark Zuckerberg

Sosial şəbəkə son olaylarla bağlı ABŞ və Britaniya hökumətlərini, eləcə də İrana sanksiyalar səbəbindən ABŞ Ədliyyə və Dövlət Departamentlərini bilgiləndirdiyini bildirib.

“Mötəbərlik vacib olduğundan bu cür davranışı yasaqlayırıq, adamlar Facebook-da gördüklərinə inanmalıdırlar”, – Facebook rəhbəri Mark Zuckerberg jurnalistlərə deyib. O, həmin hesabların arxasında kimlərin durduğunu bilmədiklərini də sözlərinə əlavə edib.

ARAŞDIRMALAR İRAN VƏ RUSİYANI GÖSTƏRİR

Facebook son tədbirlərin Rusiya və İranla əlaqədar dörd araşdırmadan qaynaqlandığını vurğulayır.

“Liberty Front Press” adlı qrup Facebook və Instagram-da xeyli hesablar yaradıb, onları 155 min digər hesab izləyir. Bu qrupun İranın dövlət mediasına bağlı olduğu bildirilir.

İkinci qrupsa “Liberty Front Press”a bağlıdır, o da çoxsaylı hesablar açıb, 15 min izləyicisi var.

Yenə İrandan fəaliyyət göstərdiyi bildirilən üçüncü qrupun izləyici sayı 813 min nəfərdir, yaxın Şərq, Britaniya və Birləşmiş Ştatlar barədə siyasi kontent paylaşıb.

Facebook bildirir ki, bu qruplar ümumilikdə reklama 12 min dollar xərcləyiblər, 28 fərqli tədbir keçiriblər.

Dördüncü qrupun bağlı olduğu mənbələri isə ABŞ hökuməti Rusiya hərbi kəşfiyyatı ilə əlaqələndirib. Bu qrup Suriya və Ukraynayla bağlı məsələlərdə siyasətə təsir göstərməyə çalışıb.

“ABŞ hüquq-mühafizə orqanları ilə birlikdə bu təhqiqat üzərində sıx işləyirik”, – Facebook bloq postunda bildirib.

 

Azadlıq Radiosu